Сурхондарё вилояти ҳокими ўринбосари–вилоят туризм бошқармаси раҳбари Жўрабек Тўраев бошчилигидаги делегация Малайзия давлатига сафар қилиб, Куала Лумпур шаҳрида бўлиб ўтаётган “AITEX” Осиё зиёрат туризми ва савдо кўргазмасида иштирок этмоқда.
Делегация аъзолари сафар доирасида Малайзиядаги Қиролича Ража Зарит София номидаги Ислом тадқиқотлари маркази раҳбари, доктор Моҳд Ҳилми Бин Рамли билан учрашди.
Учрашувда вилоят ҳокими ўринбосари–¬вилоят туризм бошқармаси бошлиғи Жўрабек Тўраев ва Имом Термизий халқаро илмий-тадқиқот маркази директори вазифасини бажарувчи, тарих фанлари бўйича фалсафа доктори (PhD) Музаффархон Жониев воҳанинг туристик салоҳияти, ислом цивилизациясидаги ўрни ва Имом Термизий халқаро илмий-тадқиқот марказининг илмий фаолияти, буюк алломалар меросини ўрганиш юзасидан амалга оширилаётган изланишлар ҳақида атрофлича маълумот берди. Президентимиз қарори билан жорий йилнинг октябрь ойида Имом Термизий таваллудининг 1200 йиллигини кенг нишонлашга кўрилаётган тайёргарлик ишлари тўғрисида фикр алмашди.
Қиролича Ража Зарит София номидаги Ислом тадқиқотлари маркази раҳбари, доктор Моҳд Ҳилми Бин Рамли делегация аъзоларини марказ фаолияти, кутубхонаси, талаба ва тадқиқотчиларга яратиб берилган шарт-шароитлар билан яқиндан таништирди.
–Малайзияликларнинг юртимизга хусусан, термизий алломалар ҳаёти ва бой илмий меросига қизиқиши бизда катта таассурот уйғотди,¬–дейди Имом Термизий халқаро илмий-тадқиқот маркази директори вазифасини бажарувчи Музаффархон Жониев.¬ –Бу даргоҳда малайзиялик олимлар ва илмий тадқиқотчиларнинг Ҳаким Термизий, Исо Термизий сингари буюк аждодларимиз ҳақидаги илмий ишлари, ўз тилларига ўгирилган асарлари билан яқиндан танишдик. Ўзаро фикр алмашдик. Шу йилнинг октябрь ойида бўлиб ўтадиган улуғ муҳандис Исо Термизийнинг 1200 йиллик юбилейларига таклиф этдик.
Учрашувда семинар ва конференциялар ташкил этиш, Ҳаким Термизийнинг илмий мероси ва қўлёзмаларини ўрганиш юзасидан ҳамкорликда тадқиқот ишлари олиб боришга келишилиб, меморандум имзоланди.
Вилоят ҳокими ўринбосари–¬вилоят туризм бошқармаси бошлиғи Жўрабек Тўраевнинг хабар беришича, сурхондарёликларнинг Малайзия Туризм, санъат ва маданият вазирлиги ҳузуридаги Малайзия туризм маркази директори вазифасини бажарувчи Сити Нур Баизура бинти Мохтар билан учрашуви ҳам қизиқарли мулоқотларга бой бўлди.
